সুত্র: NBC News
ট্রাম্ফ উ়শিয়ের গরি হইয়িদে, মাস্ক রিফাবলিকানোর বিফক্কে খেলতু যেই যুদি ডেমোক্রেটোর ফার্ত়িরে তহবিল দি সাইজ্জু গরে, তইলি 'ই়য়েনুর ফল ব'ত হ়ারাফ অ়ইবু।'
ট্রাম্ফ হইয়িদে, 'ইলন মাস্কোর লগে হত়া হইবের, মুলাকাত গরিবের হনো ফেলেন নেই। আঁয় অইন্নু হামোদ্ দুয়োদুইত আস়ি। ই়য়াবাদে তার লয় হতা হইবের হনো অ়ইশও নেই।'
ট্রাম্ফ আরো নালিশ গইরগি, ইলন মাস্ক 'ফেসিডেন' নামুর মকাম ই়য়েনুরে বেইজ্জুত গইরগি।
বিশিতবাদ্দিন ইলন মাস্ক এক্সোত ফেসিডেন ট্রাম্ফোরে লইয়েরে এক্কানোর বাদ এক্কান এগ্রেসিভ ফুশ্ট গইরগিল।
এডুভুতুরোর এক্কান ফুশ্টোত মরদানি হেলেঙহারির নালিশুত বেইজ্জে জেফরি এফস্টেইনুরলয় ট্রাম্ফোর অ়ই শমর ফুরন্তি হালুর হাতিল ত়াইবের হত়া লেহিল। যুদিও ফরদি ফুশট গ়ান ডিলেট গরি দিইয়িল।
ট্রাম্ফ শনিবাদ্দিন হইয়িদে, 'ই়ন অ়ইলদি "ফুরন হ়বর", ই়য়েন ব'অত আগুর হত়া, যিয়েন লই ব'অত বস়র দ়রিই হানফুশা সলি এইয়ির। এ'ন কি এফস্টেইনুর ফসিকিউটরেও হইয়িদে কেইস ই়য়েনুল্লয় আঁর হনো শম্ফর্ক নেই। ই়য়েন ফুরন হ়বর।'
ই়তারার হইজ্জে অ়ইবের হয়েকদিন আগে ইলন মাস্ক রিফাবলিকানুর ফস্তাব দিইয়ে হ়স্সার বিলুর বন্নাই গইরগিল।
বিশিতবাদ্দিন হুয়াইট হাউজুর উবাল অফিশুত ট্রাম্ফ শম্বাদিক অ়লুরে হইয়িল, 'আঁয় ব'অত অ়তাশ। হারন ইলন এই বিলুর ভিতুরুর হ়বর ই়ন যেনতু। আঁয় ইলনুর উওর ব'অত অ়তাশ। আঁয় ইলনোরে হতো সাইজ্জু গইরগিলাম!'
ট্রাম্ফ এই হত়া হ’অনুর হ়ানিক বাদে ইলন মাস্ক এক্কানুর ফরে এক্কান এগ্রেসিভ ফুশ্ট গরাত্ ত়াহে। যিয়েনুর মদ্দি এক্কান ত আসি়ল ডিলিট গইরি ফেলেইয়িদে ফুশ্ট ইয়েন, যেন্ডে ট্রাম্ফুর উঅর অনাস্ত়ারে সাফুট জানেইয়িল। আরেক্কান ফুশ্টুত মাস্ক হ’অইয়ি, ফেসিডেনোর টেক্স ফলিসি (অ়াসি়ল) এই বস়রুর লাশ্টে ইউএসুরে লঅসুত ফেলেইবু।
Comments
Post a Comment